مشكلة انك ما تقدر تستمتع بالحاضر. The Power of Now

اواجه مشكلة من فترة مو بسيطة ابداً واعاني منها بشكل كبير جداً : دائماً اهمل الحاضر لعيون المستقبل .. واظلم الحاضر واقارنه بشكل "غير حيادي" مع الماضي. كيف يعني ؟

قبل البعثة بكم شهر نسيت شي اسمه اليوم .. الان ... هذه اللحظة وهذه الدقيقة ، كل تفكيري عن امريكا .. ايش اعمل لما اروح لسياتل وكيف الخطة لكل يوم وصحيان من الصباح ووو .. دائماً في تخطيطنا للمستقبل نتخيل "كيف نتمنى ان نكون" وبشكل غير واقعي تماماً.

وصلنا سياتل استمتعت بشكل مو طبيعي ولله الحمد وتجاوزت فترة اللغة ، بعدها دخلت مرحلة البحث عن قبول ، صرت ماني عايش اللحظة مرة ثانية ابداً .. كل تفكيري عن قبول في تامبا .. نيويورك .. ميامي .. كاليفورنيا .. بوسطن .. نسيت شي اسمه سياتل وصرت اكره شي اسمه سياتل .. مريت بفترة صعبة نفسياً ، زملاء دراسة يرجعوا البلد ما حصلوا قبول .. زملاء حصلوا قبول وبدأت رحلة الماجستير معاهم .. في النهاية ولله الحمد حصلت على قبول في ميامي ، صارت ميامي هي "المستقبل" الجميل اللي باعوض فيه اهدافي اللي ما حققتها في سياتل ، وهنا الاحلام ممكن تكون اشياء تفاهة للبعض مثل الصحيان المبكر والهرولة وقراءة اكثر ووو ، بدأت رحلة ميامي ودخل على الخط شيء مهم جداً : الزواج ! وصار الزواج هو اهم شيء الان واهملت حاضري في ميامي وبدأ التخطيط للمستقبل وحياة الزوجية السعيدة.

الان STOP

مر على المراحل اللي فوق سنتين كامل .. 24 شهر !
هذه السنتين في يوم من الايام كانت مستقبل كنت اخطط له بشكل مفصل وحماسي .. ليش كل ما يصير المستقبل حاضر استمر مثل ما انا ؟ ايش المشكلة ؟

كنت وانا في سياتل احلم بايام ميامي وانترها بفارغ الصبر ، جات ايام ميامي وصرت اتذكر ايام سياتل بحزن كبير جداً واشتياق مو طبيعي ؟ اكيد فيه مشكلة في التعاطي مع الايام وطريقة التفكير ..

الحل كان نصيحة من زوجة اخي حازم ، كتاب اسمه the power of now

رأيي في الكتاب بكل إختصار : فلسفة كبيرة من المؤلف واستخدم لغة صعبة نوعاً ما. بالغ في التعمق في بعض النقاط ولكن اتكلم عن عدة نقاط اقدر اختصرها بـ ٣٠٪ من الكتاب فقط ، هذه النقاط مهمة جداً كانت في شرح المشكلة اللي اتكلمت عنها وخلت الكتاب يستاهل اللي اندفع فيه + الوقت اللي استهلكته في قرأته وهذه اهم النقاط حسب وجهة نظري:

- تعودنا من صغرنا على مفهوم المستقبل والماضي ، واهملنا الاستمتاع بالحاضر.
- الاستمتاع بالحاضر لا يعني اليوم او الساعة .. ولكن الثانية الحالية التي تقرأ فيها هذه الكلمة.

هنا اتوقفت عن كتابة المدونة قبل سنة وشهرين واللي رح اكتبه بعد هذه الخلاصة عبارة عن اللي ما زلت فاكره الى اليوم

- لاحظ نفسك وأفكارك كيف صارت معلقة بالـ calender والتواريخ. سعادتك ومشاعرك صارت مُستثمرة بشكل كامل في المستقبل، والبعض بشكل كامل في الماضي، وتعيش يومك جسدياً فقط. 

- طبيعي الماضي يؤثر فيك، طبيعي تفكر وتهتم بالمستقبل. لكن الكتاب يشرح بشكل فلسفي أهمية انك تفكر في اللحظة الحالية .. الان .. مو اليوم ولا هذه الساعة ولكن هذه اللحظة .. فكّر في اي شيء حولك. 

- تفكيرك بالماضي والمستقبل مستحيل يتغير، لكن بعد قراءة هذا الكتاب بتلاحظ كل مرة تشطح فيها بأفكارك بعيداً عن حاضرك. وتستوعب نفسك كيف تجبرك تسرح بعيداً كل مرة لسبب. مرة دراسة، بعدها وظيفة، بعدها زواج وهكذا. 

لو قدرت تستمتع بجلسة مع زميل فقط عشان جلستك معاه، او مشاهدة فيلم بدون ما تسرح بعيداً في أشياء تخص وظيفتك بتكون في حالة نفسية افضل بإذن الله. فكّر فيها، نسافر ونشيل هم عدد الايام المتبقية من السفر وكل ما تقرب النهاية يقل استمتاعنا بها ويزيد تركيزنا بالرجعة. الحالة المثالية انك تعامل كل يوم بحدة بعد الجلوس لوقت محدود تخطط فيه لمستقبلك. 

نصيحة: اكتب أهدافك الأسبوعية، غير انها بتعطيك صورة أوضح لأهدافك وكيف ممكن تحققها، بتعطيك فرصة انك تستمتع بشكل اكبر بحاضرك لأنك بتفتكر انه كل (هم) انت شايله مكتوب على الورق ومعاه كيف ممكن تحله. 

اذا تعتقد انه هذه الأفكار تهمك ولغتك الانجليزية متوسطة ان شاءالله الكتاب بيعجبك. 

بالتوفيق